هو أنا ينفع أبقى لسه مزعقة لإبني ومعتذراله وبعدين أقولكوا بلاش تزعقوا لولادكوا وان فيه أساليب أحسن من كده
والكلام ده؟
الموضوع ده كان مضايقني جدا، وقعدت فترة بعيدة عن الصفحة عشان مش قادرة أقولكوا تعملوا حاجه أنا شخصيا بغلط وبتسقط مني ساعات.
وفكرت كتير.. هو أنا أو أي حد عنده معلومات عن التربية المفروض انه مايغلطش؟ ملاك يعني؟
احنا بشر وكلنا بنغلط وربنا خلقنا كده
الشطارة إنك تتعلم وتعرف الصح إيه والأشطر إنك تحاول وتجاهد نفسك عشان تطبقه
على فكرة التربية جهاد وصعبة ومحتاجه نشتغل على نفسنا كمان عشان نصلح المشاكل اللي جوانا واللي تراكمت مع السنين وبقت تخلينا مثلا عصبيين زيادة على حاجات ماتستاهلش
كل ده جهاد، وليه ثواب عند ربنا ان شاء الله، وربنا بيسامح مش هنسامح احنا نفسنا؟
لما فكرت كويس قررت إني مش هسكت وهبعد لمجرد إني فلتت مني حاجه غلط
قررت أسامح نفسي عشان اقدر أسامح ولادي لما يغلطوا وأسامح اللي حواليا لما يقصروا.
وانتوا كمان سامحوا نفسكوا، وولادكوا وابدأوا كل يوم بداية جديدة، جاهدوا فيها وحاولوا تاني تحسنوا أداءكوا وتطوروا نفسكوا.
وهو ده المطلوب، اننا نتحسن كل يوم، مش مطلوب اننا نبقى ملايكة، احنا بشر